هل أنت مؤهل للهجرة إلى كندا؟ .... Check your eligibility

الحقيقة عنوان التدوينة دية مش دقيق لأنى مش هاتكلم على كل أنظمة وبرامج الهجرة إلى كندا وهى كثيرة جداً، أنا هاتكلم فقط على نظام الهجرة الجديد (نسبياً) اللى هو الإكسبريس إنترى Express Entry ومش كل أنواعه كمان لكن بالأساس على ما يطلق عليه "هجرة العمالة الماهرة" أو Federal Skilled Worker (FSW) وباتكلم بشكل أدق على تجربتى الشخصية مع شرح للنظام فى نفس السياق وأحياناً ممكن برضو أتكلم عن تجارب بعض الأصدقاء اللى سمعت عنها ولكن دون الدخول فى التفاصيل اللى أنا مش هاكون على دراية بها لأنى ما جربتهاش بنفسى، عشان كده مش عايز حد يعتقد أن الطريقة دية فقط هى المتاحة للهجرة إلى كندا، وأنا مش مستشار هجرة فمش هاقدر اتكلم عن كل ما يخص الهجرة، أنا زى ما قلت بالأساس باحكى تجربتى اللى جايز تكون مفيدة لبعض الناس اللى ظروفهم قريبة من ظروفى لكن اللى يلاقى الكلام مش مناسب لحالته يبقى محتاج يدور شوية يمين وشمال وإن شاء الله يلاقى برنامج تانى يكون مناسب ليه بين البرامج الكتير المتاحة على المواقع الرسمية الكندية للهجرة والمقاطعات.

زى ما حكيتلكم قبل كده، تم إطلاق نظام الهجرة الجديد Express Entry فى يناير 2015 وأنا كنت مستنى إنه يظهر عشان أبدأ أقرأ تفاصيله وأفهمها لأنى ما كنتش هالحق أقدم على النظام القديم اللى كان المفروض أنه بينتهى مع ظهور النظام الجديد. وفعلاً ظهر النظام فى الموعد المخطط له بتفاصيله الكثيرة على موقع وزارة الهجرة والجنسية الكندية CIC واللى هى المصدر الرسمى الأساسى لأى معلومات عن الهجرة لكندا ومع إنى لغتى الإنجليزية مش بطالة، لكن برضو كان الموضوع بالنسبة ليا فى البداية مش سهل، عدد صفحات كتير، ومصطلحات غريبة عليا وغير مفهومة بالنسبة ليا ومع كل مصطلح جديد لينكات متشعبة بتودى على صفحات تانية، ومن الصفحات التانية لينكات بتودى لصفحات ثالثة ورابعة وهكذا شجرة متشعبة وكأنها بلا نهاية، وحتى لما بقرأ موضوع وأحس إنى فهمته بيكون فاضل عندى شوية شك إنى أكون فهمته غلط وأن فهمى الغلط ده يلبسنى فى الحيط.

لو أنت مش عايز تتعب دماغك كتير فى فهم التفاصيل ممكن تدخل على اللينك ده http://www.cic.gc.ca/ctc-vac/getting-started.asp وتجاوب على الأسئلة اللى هاتظهر لك ورا بعض وفى النهاية هايقولك إذا كنت مؤهل للهجرة على نظام العمالة الماهرة فى الإكسبريس إنترى ولا لأ.

بس وانت بتعمل الكلام ده خلى بالك من حاجتين، لو أنت لسه ما امتحنتش امتحان اللغة الإنجليزية IELTS فانت لازم هاتحط الدرجات اللى انت متوقع الحصول عليها فى الامتحان (وليكن مثلاً أربع ستات، 6 فى كل من المهارات الأربعة)، ولو أنت لسه ما قيمتش المؤهل الدراسى بتاعك فبرضو بتعتبر أنك حصلت على تقرير التقييم المسمى (ECA Report) من أحد المؤسسات المعترف بيها فى كندا (زى الWES مثلاً) للمؤهل الدراسى بتاعك، من غير الاثنين دول مش هاتكون مؤهل للهجرة على البرنامج ده وبالتالى لازم تكون الإجابات فيهم باعتبار ما سيكون لو أنت لسه ما خلصتش الخطوتين دول فعلاً واللى المفروض هايكونوا بعد كده أول حاجة تبدأ بتجهيزها (فى حالة أنك تأكدت إنك مؤهل من حيث المبدأ للهجرة إلى كندا على البرنامج ده) عشان تفتح بروفايل وتقدم ملفك المبدئى على موقع CIC وتدخل ما يسمى بال Pool.

لو حصل إنك ظهرلك فى نهاية الأسئلة إنك غير مؤهل للبرنامج ده ما تتخضش، ممكن تبدأ تجرب إعادة الأسئلة مع زيادة بعض العوامل زى زيادة درجاتك فى اللغة أو إضافة إجابات بنعم لإضافة بعض النقاط عن طريق الزوج/الزوجة لو ما كنتش ضفتها بالفعل فى إجابة الأسئلة الخاصة بالموضوع ده فى المرة الأولى.

أنا شخصياً ما أنصحش إنك تعتمد على الطريقة الأوتوماتيكية اللى فوق دية ولو كنت أنا نفسى أعتمدت عليها لأنى وقتها للأسف ما كنتش أعرف غيرها، لكن الأفضل إنك تفهم إزاى الموضوع بيتحسب وتستنتج بنفسك أنت مؤهل ولا لأ ولو لأ إزاى ممكن تغير فى الموضوع وتكون مؤهل للبرنامج.

الموضوع كله عبارة عن حساب للنقاط. المفروض عشان تكون مؤهل تحصل على 67 نقطة من إجمالى 100 نقطة الخاصة بالتأهيل المبدئى، وتعالوا أشرحلكم إزاى تحسبوها واحدة واحدة.

أولاً: اللغة:

كل متقدم رئيسى ممكن ياخد نقاط على اللغتين الإنجليزية والفرنسية، بس المفروض يحدد مين فيهم اللغة الأولى بالنسبة ليه ومين اللغة الثانية.

فى اللغة الأولى (نفترض إنها الإنجليزية) لازم ما تقلش درجاتك عن CLB level 7 واللى بيكافئ 6 فى كل مهارة من مهارات امتحان IELTS، وعشان نحول درجات الIELTS  إلى ال CLB Level المكافئ ليها بنستخدم الجدول التالى، وبنحدد منه الCLB Level  المكافئ لكل مهارة لوحدها مش للأربعة مع بعض.

CLB Level	Reading	Writing	Listening	Speaking
10	8.0	7.5	8.5	7.5
9	7.0	7.0	8.0	7.0
8	6.5	6.5	7.5	6.5
7	6.0	6.0	6.0	6.0
6	5.0	5.5	5.5	5.5
5	4.0	5.0	5.0	5.0
4	3.5	4.0	4.5	4.0

بالنسبة ليا أنا حصلت بعد كده لما امتحنت IELTS على 8 درجات فى الاستماع وعلى 6.5 فى كل مهارة من المهارات الثلاث الأخرى، وعشان نقدر نحسب نقاط التؤهل على نظام إكسبريس انترى بنستخدم الجدول التالى مع الجدول السابق، وبكده هنلاقى إنى أستحق 6 نقاط عن مهارة السماع اللى هى IELTS Score 8 = CLB 9، و5 نقاط عن كل مهارة من المهارات الثلاث الأخرى اللى كلها IELTS Score 6.5 = CLB 8، وبالتالى يكون مجموع درجات اللغة الأولى عندى هو 6+5+5+5=21 نقطة من إجمالى 24 نقطة.

First Official Language	Points
	Speaking	Listening	Reading	Writing
CLB level 9 or higher	6	6	6	6
CLB level 8	5	5	5	5
CLB level 7	4	4	4	4
Below CLB level 7	Not eligible to apply

بالنسبة للغة الثانية فبناخد عليها 4 نقاط فقط لكل المهارات مجتمعة لو جبنا CLB 5 أو أعلى فى كل مهارة من المهارات الأربعة، ولو أقل من كده مش بنستحق عنها أى درجات. وأنا فى حالتى ما امتحنتش وما كنتش ناوى امتحن لغة تانية إلا لو اضطريت لذلك، عشان كده كان درجاتى فى اللغة الثانية 0 درجة من إجمالى ال 4 درجات.

ثانياً: التعليم:

بعد الحصول على تقرير التقييم ECA Report من ال WES أو أى مؤسسة أخرى معترف بيها، بتحسب درجاتك كالتالى:

·         دكتوراه = 24 درجة

·         ماجيستير (ماستر) = 23 درجة

·         دراستين أو دبلومتين بعد الثانوية أحدهما لا تقل عن 3 سنوات دراسة = 22 درجة

·         دراسة واحدة أو دبلومة بعد الثانوية لا تقل عن 3 سنوات دراسة = 21 درجة

·         وفى درجات أقل للمؤهلات الأقل

بالنسبة ليا أنا كان معايا MBA وبالتالى أخدت فى البند ده 23 درجة من إجمالى 24

ثالثاً: الخبرة العملية:

قبل ما نتكلم عن الخبرة العملية المفروض أقولكم بشكل مختصر أن فيه حاجة اسمها النوك أو National Occupation Classification (NOC)، وده عبارة عن تصنيف للمسميات الوظيفية موحد على مستوى كندا، وكل NOC بيعبر أو بيشمل عدة مسميات وظيفية فرعية تحته كلهم بيشتركوا فى مهام ومسؤليات واحدة تقريباً وليهم نفس المؤهلات الدراسية والخبرة المطلوبة للقيام بيهم، وقبل ما تبتدأ تحسب درجاتك هنا ممكن تدخل على موقع النوك من هنا http://www.cic.gc.ca/english/immigrate/skilled/noc.asp وتحاول تتعرف على النوك المناسب ليك واللى قضيت فيه أطول فترة من خبرتك العملية واللى تقدر تجيب بيه اثبات فعلاً (شهادة خبرة) مطابقة للمواصفات المطلوبة عشان تقدر تستفيد بالدرجات اللى ممكن تتحسب لك على الخبرة دية، وفى عوامل تانية فى اختيار النوك الأساسى ليك ممكن نبقى نتكلم عنها بعدين لما يجى وقتها.

حساب درجات الخبرة المرتبطة بالنوك الأساسى اللى استقريت عليه هايكون كالتالى:

·         6 سنوات فأكثر 15 نقطة

·         4-5 سنوات 13 نقطة

·         2-3 سنوات 11 نقطة

·         سنة واحدة 9 نقاط

وبالنسبة ليا كان عندى أكثر من 6 سنوات فاستحق عليهم ال15 نقطة كاملة من إجمالى 15

رابعاً: السن:

وتحتسب نقاط السن كالتالى:

·         أقل من 18 سنة صفر (لا يحتسب أى نقاط)

·         18-35 يستحق 12 نقطة

·         ثم بعد عمر ال35 تقل نقطة مع كل سنة، 36 يستحق 11 نقطة وهكذا حتى يصل عمرك 46 تستحق نقطة واحدة وعند ال47 عاماً يكون صفر (لا يحتسب أى نقاط)

بالنسبة ليا كان عمرى وقتها بين ال36 وال37 فى هذه الحالة يعتبر 36 وهذا يستحق 11 نقطة من إجمالى 12 نقطة

خامساً: عرض عمل فى كندا:

وفى هذا البند لم أحصل على أى نقاط وبذلك أحصل على 0 نقطة من إجمالى 10 نقاط.

سادساً: التأقلم:

كل ما سبق من عوامل يشمل المتقدم الرئيسى للهجرة فقط والذى قد يكون رجل أو امرأة متزوج أو أعزب، ولكن فى هذا البند تحتسب النقاط عندما تحصل المرافق (الزوجة/الزوج) على درجات لا تقل عن CLB 4 فى امتحان اللغة الانجليزية أو الفرنسية، أو أن أياً من الزوج أو الزوجة درس أو عمل أو له أقارب فى كندا فيستحق أيضاً عنهم نقاط، وفى هذا البند لم أحصل على أى نقاط أى 0 نقطة من إجمالى 10 نقاط.

بتجميع النقاط الخاصة بى من كل ما سبق تكون كالتالى: 21 اللغة + 23 التعليم + 15 الخبرة + 11 السن + 0 عرض عمل + 0 تأقلم = 70 نقطة، وبكده أكون تجاوزت الحد الأدنى اللى هو 67 وأصبحت والحمد لله مؤهل للتقديم على نظام Express Enter  -  Federal Skilled Worker بدون الحاجة أنى أطلب من زوجتى تمتحن IELTS أو إنى أضطر أذاكر وامتحن لغة فرنسية.

مهم هنا برضو أوضح أكثر من نقطة، الأولى أنك مش هايفرق معاك حاجة إنك تكون 67 بالضبط أو 100 نقطة كلهم، فى الحالتين هاتكون مؤهل للتقديم وده مش هايديك أى أولوية فى حاجة لغاية دلوقتى، غير فى حاجة واحد فقط، وهى عنصر الأمان، الأمان بالنسبة لحاجتين، أنك لو عمرك 35 أو أكثر مع كل سنة هاتفقد نقطة وبالتالى لو كان إجمالى نقاطك هنا 67 بالضبط كده هاتتحول من مؤهل إلى غير مؤهل للتقديم، والحاجة التانية إنك فى حالة كانت خبرتك 6 سنوات بالضبط ومحسوبة على فترات عمل اشتغلتها فى كذا شركة ففى حالة إنك ما تقدرش تجيب شهادة خبرة من أحد الشركات تكون مطابقة للمواصفات المطلوبة أو تجيبها ولكن يتم رفضها بعد التقديم لأى سبب فده هاخليك تخسر النقاط الخاصة بالفترة دية وبالتالى لو كنت 67 نقطة فقط أو قريب منها جداً فده برضو معناه أن فقدان أى نقاط ممكن يحول حالتك من مؤهل إلى غير مؤهل، من المنطلق ده بس إنك يكون عندك نقاط أكثر من 67 بشوية معقولين بيمثل عنصر أمان ضد أى تغيير أو رفض محتمل لأحد شهادات الخبرة المقدمة.

عايز أوضح برضو أن فكرة الأمان ضد التغيير أو الرفض المحتمل بمعرفة أنت درجات كام بالضبط من ال100 درجة المذكورين هنا، المعلومة دية مش هاتقدر تعرفها ومش هتاخد بالك من مخاطر تغير السن أو رفض شهادة خبرة لو أنت أكتفيت بالطريقة الأوتوماتيكية لحساب التأهيل للبرنامج الللى ذكرتها فى البداية، عشان كده أنا بانصح أنك تفهم بالتفصيل وما تكتفيش بأى حاجة تديك النتيجة النهائية فقط.

نقطة كمان أحب أوضحها أن هناك أكثر من نظام للنقاط فى الهجرة إلى كندا، واللى أنا شرحته هنا هو نقاط اختبار الأهلية المبدئية للتقديم على نظام إكسبريس إنترى العمالة الماهرة أو ما يطلق عليه Eligibility Check for Express Entry – Federal Skilled Worker، وإذا كانت نتيجة الاختبار ده أنك مؤهل فالخطوة اللى بعد كده هاتكون معرفة طريقة حساب نظام آخر للنقاط وهى نقاط الملف بتاعك عندما يتم دخوله إلى ال Pool أو ما يطلق عليه Comprehensive Ranking System (CRS) – Express Entry وده هايكون موضوع تدوينة تالية بإذن الله بعد ما نوضح قبلها إيه هى المراحل أو المحطات الرئيسية اللى المتقدم بيمر بيها فى رحلة التقديم على الهجرة لكندا لو كان فى العمر بقية.

بداية من التدوينة دية ومادام بدأنا فى كتابة كلام تفصيلى عن نظام الهجرة وأرقام وطرق للحساب فهم إنى أقولكم أن كل الكلام اللى قولته فوق ده سارى حتى كتابة هذه التدوينة لكن وارد جداً إنه يتغير فى أى وقت سواء تغير كبير أو صغير وبدون مقدمات طويلة، لكن الخبر الكويس أنى هاحطلكم هنا اللينك بتاع الموقع الرسمى اللى فيه الكلام ده واللى دايماً بيكون فى نهاية كل صفحة آخر تاريخ لتحديث الصفحة فلو لقيتم آخر تاريخ لتحديث الصفحة الرسمية المشار ليها قبل تاريخ كتابة التدوينة دية يبقى كده ما حصلش تغيير وكل حاجة هتلاقيها زى ما أنا كتبتها هنا، أما لو التاريخ بعد تاريخ التدوينة هنا فكده يبقى خلى بالك كويس واقرأ الكلام الرسمى كله لمعرفة ايه هو النظام الجديد اللى سارى وقت إطلاعك على الموضوع.

المرجع الرسمى للمعلومات الواردة فى هذه التدوينة: http://www.cic.gc.ca/english/immigrate/skilled/apply-factors.asp

لو ما كنتش قريت التدوينة السابقة، تقدر تقراها من اللينك ده: http://journeytothemissing.blogspot.ae/2017/02/blog-post_20.html