امتحان اللغة الإنجليزية IELTS

بعد انقطاع عدة أشهر عن الكتابة فى مدونتى الناشئة، أعود للكتابة بهذا البوست اللى أتمنى أنه يكون مفيد ليكم.

الحقيقة من أسباب الانقطاع هو انشغالى باجراءات الهجرة الخاصة بي والتوتر اللى أوقات كتيرة كان بيأثر على مزاجى العام وقدرتى على الكتابة، بالإضافة إلى اننى كنت متبنى استراتيجية إنى اكتب المواضيع فى مدونتى بتسلسل منطقى وأوصف بشكل تفصيلى قدر الإمكان كل المراحل اللى مريت بيها وده كان بيأثر بشكل كبير على قدرتى على الإستمرار لما ألاقى نفسى قدام موضوع الكتابة فيه مش سهلة ومحتاجة وقت وتركيز غير متوفر. عشان كده قررت إنى أغير الاستراتيجة دية لحاجة أسهل وهى إنى أكتب أى موضوع مفيد وسهل بالنسبة ليا دون التقيد بالترتيب المنطقى لملف الهجرة لأن فى أكتر من موضوع (زى موضوع النهارده) تقريبا شبه مكتوب جاهز ولم يتم نشره حتى الان بسبب الترتيب المنطقى.

الحمد لله وبعد أن تمت الموافقة على طلب الهجرة الخاص بى وقمت باستلام فيزا الإقامة الدائمة بكندا وحجزت رحلة السفر إلى كندا أصبحت أكثر هدوءاً وقدرة على الكتابة وأيضاً أكثر حرصاً إنى أكتب كل اللى عندى وقد يكون مفيد قبل أن يتطاير بالنسيان أو ضياع المصادر المطلوبة للكتابة.

هناك 3 وثائق هامة جداً فى التقدم للهجرة إلى كندا وهى نتيجة امتحان اللغة الإنجليزية IELTS وتقرير اعتماد المؤهلات الدراسية ECA Report by WES وكشف حساب البنك بالمبلغ المحدد حسب عدد أفراد الأسرة وهو ما يسمى ب proof of fund (POF). وبوست اليوم مخصص لمشاركة بعد المعلومات والنصائح اللى تساعدكم فى التحضير لامتحان (ايلتس) واجتيازه بدرجات تساعدكم على التقدم للهجرة إلى كندا.

ممكن تسمع كلام غير دقيق عن امتحانات أخرى للغة الإنجليزية غير (ايلتس) تؤهلك للهجرة لكندا، لكن الحقيقة أن أى متقدم للهجرة من خارج كندا ليس لديه أى خيارات أخرى غير امتحان (ايلتس) لكن من برنامج ومن حالة إلى أخرى قد يختلف الحد الأدنى المطلوب فى نتيجة (ايتلس). على سبيل المثال فى برنامج Federal Skilled Worker under Express Entry  يجب الحصول على الأقل على 6 فى كل مهارة من المهارات الأربعة (سماع، قراءة، كتابة، تحدث). لكن فى برامج أخرى مثل برامج الهجرة الورقية أو ما يطلق عليها occupation in demand  التى يتم التقدم فيها للمقاطعة أولاً قبل المرحلة الفيدرالية فهى تقبل المتقدمين بدرجات حتى 5 درجات فى كل مهارة.

أولاً: للحصول على المعلومات الأساسية عن إمتحان أيلتس يمكنك الإطلاع على الأسئلة الشائعة من موقع أيلتس الرسمى

https://ielts.britishcouncil.org/FAQ.aspx

أو مشاهدة فيديو زى كده

https://www.youtube.com/watch?v=Lcp8h9AT-Jg

ثانياً: فيه حاجات كتير ممكن تكون مفيدة وتحسن مستواك فى اللغة الإنجليزية وتؤهلك للحصول على درجات أعلى فى الإمتحان، لكن مفيش حاجة ممكن تكون مفيدة أكتر من إنك تحل إمتحانات كتير، ومن بين كتب الإمتحانات الكتير اللى ممكن تلاقيها سواء على النت أو فى السوق هات من الآخر وخليك فى  سلسلة كتب

“Cambridge IELTS General Training Student's Book with answers (IELTS Practice Tests)”

بس أنت تخلصها، هى سلسلة صدر منها حتى الان 11 كتاب، كل واحد فيه تقريباً 4 امتحانات، إبدأ فيها من آخر كتاب اللى هو رقم 11 وهو الأحدث والأقرب إلى طبيعة الامتحان الحالى، لكن أعتقد كلهم ماشيين على نفس النسق وينفعوا للتدريب على الامتحان وأحياناً بتلاقى الأقدم أصعب شوية بس كويس علشان لما تدخل الامتحان الفعلى تحس إنه سهل.

ده رابط الكتاب لو هاتشتريه من على أمازون: https://www.amazon.com/Cambridge-General-Training-Students-answers/dp/1316503887/ref=pd_lpo_sbs_14_img_2?_encoding=UTF8&psc=1&refRID=Y61N2S38F6MD08B99MB4

ولو هاتحمله بأى طريقة أخرى تقدر تبحث عنه باسمه بالضبط وده ينطبق على أى كتاب أو مصدر هاذكره ليكم هنا فى البوست وبنفس الطريقة هاتقدر توصل للكتب السابقة من نفس السلسلة.

ثالثاً: مهم إنك تعرف إن أغلب اللى لغتهم الأصلية هى الإنجليزية لو دخلوا امتحان (ايلتس) علطول من غير إعداد ممكن يجيبوا فيه درجات سيئة وده لأنه مش مجرد قياس لمستوى اللغة لكنه زى أى إمتحان ليه طريقة ومحتاج تدريب على الطريقة دية وفيه نصائح بتكون مفيدة جداً فى إنك تعرف تجيب درجات أعلى. الموضوع ده فيه فيديوهات وكتب كتير جداً بعضها بمئات الصفحات، لكن فعليا أنت مش محتاج تضيع وقت كبير فى القصة دية علشان تركز فى حل امتحانات كتير ويكفيك المصدرين المختصرين دول:

أصغر كتاب ممكن تقراه فى الموضوع ده هو “Ace the IELTS” تقدر تشتريه من هنا:

http://www.ielts-blog.com/ace-the-ielts-offer-page/

حلقات حوارية مع ناس دخلوا الامتحان من بلاد مختلفة وقدروا يحصلوا فيه درجات عالية ونصائحهم ليك، ده أنا حملته وحولته mp3 وبقيت اسمعه فى السيارة وهتلاقى فيه نصائح كتير بتتكرر من ناس مختلفة https://www.youtube.com/watch?v=hb0HwQz9MeA&list=PLr_2H7sWzYMiMUxBnQV7a9hTEsqEJgKAh

رابعاً: الامتحان كما هو معروف 4 أقسام: (القراءة) و(السماع) ودول بتقدر تعتمد على الإجابة النموذجية الموجودة فى نفس الكتاب فى تصحيحهم ومعرفة درجتك، أما بالنسبة لقسم (الكتابة) أوقات بتلاقى إجابة نموذجية لكنها مش بتخليك تقدر تقيم إجابتك، وعلشان كده فيه مواقع كتير بتقدم خدمة تصحيح جزء الكتابة فقط بمقابل، أفضلها من حيث السعر وجودة معقولة هو اللينك ده

http://www.ielts-blog.com/check-your-ielts-writing/

الباقة اللى بتصححلك 8 موضوعات كتابة (رسالة أو مقال) مقابل 28 دولار هى الأكثر توفيراً، فيه مواقع تانية ممكن جودتها أعلى بس برضو أغلى فى السعر.

خامساً: يتبقى قسم (التحدث) لكى تتدرب على التحدث سواء مع أصدقاء تختارهم مجاناً إذا اتفقتم على ذلك (مش حل واقعى قوى) أو مع مدرسين بمقابل مادى (وده اللى كل الناس بتعمله) فأفضل موقع هو http://www.italki.com الموقع ده تقدر من عليه تستأجر المدرس اللى تختاره بالساعة وفيه الأسعار تتفاوت من 5 إلى 35 دولار للساعة الواحدة، نصيحتى بلاش المدرسين اللى أقل من 10 دولار للساعة لأن فى الأغلب مش هايكون الإنجليزية لغتهم الأصلية ومش هايكون مستواهم كويس، وبلاش الأسعار المبالغ فيها، يعنى فوق 25 دولار برضو، شوف التقييمات واختار اللى يكون تقييمه مرتفع ويكون فى نفس الوقت درس حصص أيلتس كتير قبل كده (كل مدرس على صفحته هو درس كام حصة من كل نوع من الحصص اللى هو بيدرسها) ويكون مواعيده المتاحة مناسبة لمواعيدك. أغلب المدرسين فى أثناء الحصة مش هايكون عندهم مانع يمشوا معاك بدماغهم أو بدماغك لو أنت عندك خطة معينة، وممكن يصححوا ليك الكتابة برضو بس هايكون أغلى من الخدمة اللى كلمتك عليها فوق بس ممكن تعمل ده مرتين ثلاثة بالكتير علشان يكون عندك فرصة أفضل للحوار حول أخطائك فى الكتابة وكيفية تحسينها. حاول تاخد مع أكتر من مدرس وتشوف هاتستريح مع مين أكتر، وعلشان كمان تاخد رأيهم فى مستوى إجاباتك فتبقى متطمن أكتر لحكم أكتر من شخص لأن الموضوع تقريبى ومش دقيق أوى. وممكن كمان تاخد رأيهم فى المدة اللى انت محتاجها علشان تجيب درجات معينة بعد ما يعرفوا مستواك الحالى وعدد الساعات المطلوبة كل أسبوع لإنجاز المهمة.

أنا بعد تجربة حوالى 7 مدرسين ممكن أرشحلكم المدرسين الاثنين دول وأنصحكم لو تقدروا تمشوا مع الاثنين يعنى مثلاً كل اسبوع حصة مع كل واحد فيهم يبقى كويس جداً.

Gad, English teacher from United Kingdom

https://www.italki.com/teacher/602226?ref=2708990

Katey Nixon, English teacher from United Kingdom

https://www.italki.com/teacher/833763?ref=2708990

سادساً: كتب الامتحانات اللى قلتلكم عليها هنا يفضل تقتصر منها على (القراءة) و(السماع) أما مواضيع (التحدث) و (الكتابة) يفضل تاخدها طازة (حديثة) من ناس دخلت الامتحان حديثاً وكتبوا إيه المواضيع اللى جاتلهم وده تقدر تعرفه من اللينك ده  مرتبين من الأحدث إلى الأقدم http://www.ielts-blog.com/category/recent-ielts-exams/

سابعاً: من الحاجات اللى هتحتاجها كتير وانت بتذاكر القواميس، ممكن تستخدم ترجمة جوجل سواء من الكمبيوتر أو من الموبايل، ونسخة الموبايل فيها حاجة ظريفة إنك ممكن تشغل الكاميرا وتحطها على الكلمة الإنجليزية من غير ما تصور هاتطلعلك الترجمة العربية ليها، ومن القواميس الأنجليزية الأونلاين الأفضل هو قاموس كامبريدج فى اللينك ده http://dictionary.cambridge.org/

ثامناً: طيب لو عايز تقوى حصيلتك اللغوية من الكلمات، ده ما يكونش بشكل عام لأن فيه كلمات معينة أهم من غيرها بالنسبة لامتحان أيلتس، ودية ممكن تعرفها وتتدرب عليها من كتاب “Cambridge English Vocabulary for IELTS” من اللينك وده تقدر تشتريه من الرابط:

http://www.cambridge.org/us/cambridgeenglish/catalog/cambridge-english-exams-ielts/cambridge-vocabulary-ielts/cambridge-vocabulary-ielts-book-answers-and-audio-cd

تاسعاً: طيب لو عايز تقوى مهارة (السماع) عندك الموقع ده http://allearsenglish.com عليه عدد لانهائى من ال mp3 podcasts  مجاناً تقدر تحمل من عليه شوية تسمعهم وبعدين تشوف اللى بعدهم وهكذا، ميزته إنه مسلى جداً وتعليمى فبيشرح الكلمات الصعبة بالانجليزي وبيديك نصائح أحياناً فيما يخص امتحان أيلتس برضو أو بيكلمك عن الفروق بين الإنجليزي اللى فى الكتب واللى فى الحياة الفعلية ولو مستواك أحسن شوية أو ما عجبكش الموقع ده فالأحسن تدخل على موقع http://www.ted.com/topics وهنا هتلاقى عدد ضخم من محاضرات الفيديو مقسم حسب المواضيع ويمكن إظهار نص الحديث سواء باللغة العربية أو الأنجليزية أو بدون وتقدر تحمل أى فيديو مع نص اللغة اللى تختارها أو بدون، بس حاول تخليك فى المتحدثين اللى لغتهم الأصلية الإنجليزية وده هاتقدر غالبا تعرفه من طريقة كلامهم أو شكلهم أو الموضوع اللى بيتكلموا فيه، وممكن برضو تتابع حاجة لايف زى إذاعة CBC Canada على النت أو على الموبايل تحمل البرنامج من بلاى ستور أو تشوف الأخبار الأنجليزية فى التلفزيون، وممكن برضوا تجرب لو حبيت تسمع Audio books خاصة الروايات.

عاشراً: طيب لو عايز تنمى مهارة القراءة فى المواضيع المرتبطة بالحياة أفضل حاجة إنك تتابع موقع إخبارى أجنبى زى bbc أو CBC Canada لأنه بيجيبك أخبار عن المواضيع اللى ممكن تجيلك فى الامتحان زى البيئة والدراسة والأفلام والترفيه والجريمة والإرهاب والرياضة وغيرها

مصادر أخرى:

أفضل قناة على يويتوب لتعليم الإنجليزية وفيها سلاسل كاملة من الدروس لعدد ضخم من المدرسين

https://www.youtube.com/user/engvidenglish/channels

كورس أيلتس كامل فيديو على يوتيوب بس ممكن يكون رتمه بطئ وممل شوية ممكن يكون مناسب للى مش مستعجل

https://www.youtube.com/watch?v=p1UeGt-OtWE&list=PL40C0DB58C7982D1C

باستخدام كلمات البحث الموجودة فى اللينك ده يوتيوب هايجيبلك نماذج محاكاة لامتحان التحدث ويقولك فى حالات كتير الممتحن ده يستحق درجة كام بإجابته دية

https://www.youtube.com/results?search_query=ielts+speaking+practice+test

كورس مجانى اونلاين بيعمله المركز البريطانى للإعداد لامتحان ايلتس كل فترة، تقدر تسجل عليه من الرابط

http://takeielts.britishcouncil.org/prepare-ielts/free-ielts-online-course